Հայաստանում ԱՄՆ դեսպան Ռիչարդ Միլսը դեսպանատան ֆեյսբուքյան էջում վերհիշել է՝ երկու տարի առաջ այս օրը երդմամբ ստանձնել է Հայաստանում 8-րդ ԱՄՆ դեսպանի պաշտոնը:
«2015թ. այդ օրն առանձնահատուկ էր նրանով, որ ես նորովի սկսեցի արժևորել իմ հիացմունքն ու սերը ամենայն հայկականի հանդեպ։ Նաև, որպես դեսպան, ինձ չտեսնված մի հնարավորություն տրվեց, որ ես ի ցույց դնեմ այն ամենը, ինչ կապում է մեր երկու երկրներին՝ սկսած տնտեսական կապերից մինչև ռազմական համագործակցություն, մաեստրո Մալխասից մինչև պուլիցերյան մրցանակակիր բանաստեղծ Բալաքյան, և նույնիսկ մինչև Քարդաշյանների ձեռներեց ընտանիք»,- գրել է դեսպանը:
Նա պատմել է, որ ինքը և իր կին Լին մեծ սիրով ծանոթացել են «բազմաթիվ բարեհաճ ու հյուրընկալ մարդկանց» հետ։
«Այստեղ՝ Երևանի մեր նստավայրում սիրով հյուրընկալել եմ բազմաթիվ հայ բարեկամների ու գործընկերների: Ի դեպ, այստեղ Հայաստանում մենք նաև կատու ենք ձեռք բերել, անունը՝ Գոզո: Ժամանելուց ի վեր մեզ համար շատ հետաքրքիր էր հենց տեղացիներից լսել այստեղի անցուդարձի մասին. դա կարող էր լինել մեր տանը, երբ ճաշից հետո մի բաժակ կոնյակ էինք ճաշակում, կամ համաժողովի մեծ սեղանի շուրջ, որտեղ հայկական սուրճ էինք վայելում ու խոսում, զրուցում այն մասին, թե ինչպիսի ապագա են տեսնում երկրի համար ու նշում, թե ինչ կարող է անել Միացյալ Նահանգները՝ օգնելու Հայաստանին դառնալ ավելի բարեկեցիկ ու ժողովրդավար»,- նշել է նա:
Ռիչարդ Միլսը նկատել է, որ Հայաստանում բոլոր դպրոցականներն անգիր գիտեն ու մեջբերում են ամերիկացի նկարիչ Ռոքվել Քենթի խոսքերն այն մասին, որ աշխարհում Հայաստանից զատ չկա մեկ այլ վայր, որտեղ մեկտեղված են այդքան հրաշալիքներ:
«Ես ու Լին լիովին համամիտ ենք պ-ն Քենթի հետ, իսկ ամենահրաշալին անկասկած ոգեշունչ մարդիկ են, որոնցով բնակեցված է այս երկիրը, մարդիկ որոնց շնորհիվ Հայաստանը դիմակայել է դաժան պատմությանը ու դիմակայում է մարտահրավերներով լեցուն ներկային: Եվ երկրորդ ամենահրաշալի բանն այստեղ նվիրված թիմի՝ հայերից ու ամերիկացիներից կազմված դեսպանատան թիմի հետ աշխատելն է, թիմ, որն ամեն օր լծված է հայ-ամերիկյան բարեկամության ամրապնդման գործին: Ես ու Լին դեռ այստեղ ենք լինելու ու եթե կան տեղեր, որոնք պետք է անպայման այցելել, եթե կան ուտեստներ, որ պետք է ճաշակել, ապա խնդրում եմ ասել ինձ դրանց մասին»,- գրել է Հայաստանում ԱՄՆ դեսպանը: