Եթե մի գիշերվա մեջ մարդիկ վերագնահատեցին արժեքները, ապա ես ասելիք չունեմ՝ դեկտեմբերի արտահերթ ընտրության հարցում Նիկոլ Փաշինյանին աջակցած ՀՀԿ կուսակիցների և խմբակցության անդամների մասին խոսում է ՀՀԿ խոսնակ Էդուարդ Շարմազանովը: Հասկանալի է ՀՀԿ խոսնակի դիրքորոշումը: Բայց ինչո՞ւ է նրա համար զարմանալի «մեկ գիշերվա» երևույթը ՀՀԿ-ում:
Տասը տարի ՀՀԿ-ում առանցքային որոշումները կամ շրջադարձները եղել են մեկ գիշերում: Ավելին, ներկայիս ՀՀԿ-ն ըստ էության հենց մեկ գիշերում ձևավորված կորպորացիա է: Ոչ թե կուսակցություն, որովհետև որպես կուսակցություն ՀՀԿ-ն ձևավորվել է ավելի վաղ, այլ կորպորացիա, ինչպիսին դարձավ 1998 թվականի փետրվարի 3-ից հետո:
Մեկ գիշերում ՀՀԿ հովանոցի տակ մտած տասնյակ պատգամավորները դարձան Հանրապետական, որովհետև իշխանությունն անցնում էր Հանրապետականին: Ինչ կա զարմանալի, որ մեկ գիշերում ձևավորված իշխանական կորպորացիան մեկ գիշերում էլ կարող է ըստ էության փլուզվել: Առավել ևս, որ անցնող տասը տարում էլ ՀՀԿ-ում գիշերային անակնկալները քիչ չէին: Պարզապես եթե մինչ այդ գիշերային անակնկալներ մատուցվում էին հանրությանն ու պետությանը, որպես կանոն՝ ոչ այնքան հաճելի և շահեկան, ապա այս դեպքում անակնկալ մատուցվել է ՀՀԿ-ին՝ դարձյալ, իհարկե, ոչ հաճելի:
Բայց գուցե հիմա ՀՀԿ-ականները կպատկերացնեն, օրինակ, թե ինչ ասել է մեկ գիշերում հանրությանը ներկայացնել հայ-թուրքական հայտարարություն, այն էլ՝ ապրիլի 24-ի նախօրեին, կամ մեկ գիշերում հանրությանը հայ-թուրքական արձանագրություններ մատուցել, կամ հետո մեկ գիշերում Եվրամիության հետ Ասոցացման ծրագրի գործընթացից շրջադարձ կատարել ԵՏՄ անդամություն: Այդ «գիշերային» կառավարման դեմ Հանրապետական որևէ պատգամավոր, որևէ կուսակցական ֆունկցիոներ չէր ընդվզում, թեև Սերժ Սարգսյանը իհարկե նույնիսկ ՀՀԿ-ից անկախ էր կայացնում այդ որոշումները: Նա ՀՀԿ-ին չէր վստահում՝ հասկանալի պատճառով: Բայց գիշերային այդ անակնկալները ՀՀԿ-ին չէին մտահոգում, որովհետև դրանք դիտարկվում էին բացարձակ իշխանության գրավական: Կորպորացիան առաջնորդվում էր պարզ սկզբունքով՝ ինչ անում է Սերժ Սարգսյանը, ճիշտ է անում, և կապ չունի՝ ցերեկներն է անում, թե գիշերները:
Հիմա պարզապես գիշերները սկսել են աշխատել ՀՀԿ-ի դեմ, բայց դրա պատճառներն այլ տեղ չեն, քան հենց ՀՀԿ-ում: Այդ իրավիճակը փոխելու համար պետք է փոխվի ՀՀԿ-ն: Միայն իշխանությունը թողնելը բավական չէ, պետք է թողնել շատ ավելի կարևոր բաներ մտածողության, պատկերացումների դաշտից և ձեռնամուխ լինել իշխանական, իսկ այժմ դեռևս հետիշխանական կորպորացիայից քաղաքական ուժ դառնալու գործընթացին:
Առայժմ ՀՀԿ-ում չի նկատվում այդպիսի գործընթաց: ՀՀԿ-ն առայժմ փլուզվող կորպորացիա է, և պատահական չէ, որ այն փլուզվում է, այսպես ասած, գիշերային ռեժիմով: Ի վերջո՝ զարգացած շատ երկրներում տարբեր աշխատանքներ կատարվում են գիշերը՝ ցերեկը աշխատող հանրությանը չխանգարելու համար: