«Դեպի երազանք» նոր սերիալի մասին արդեն պատմել ենք: Գլխավոր հերոսներին մարմնավորում են Կարեն Ասլանյանը եւ Քրիստինա Եղոյանը: «Ֆուլ Հաուս»-ից հայտնի դերասանուհին BRAVO.am-ի հետ զրույցում նշել է, որ առաջին անգամ հանդես է գալիս նաեւ որպես երգչուհի:
«Հերոսուհիս Նարեն է, ով ծնվել ու մեծացել է գյուղում: Նա շատ խելացի, համեստ ու դաստիարակված է: Մանուկ հասակում կորցնում է մորը, բայց իր հիշողություններով երգ է գրում նրա մասին եւ Երեւան գալու առաջին իսկ օրվանից փորձում կյանքի կոչել երազանքը` երգ ձայնագրել, նկարահանել տեսահոլովակ՝ նվիրելով մայրիկի հիշատակին»,-նշել է Քրիստինան:
Սերիալի առանցքում, իհարկե, կրկին սիրային պատմություն է.«Երեւանում Նարեն աշխատանքի է անցնում մի ընտանիքում, որտեղ էլ սիրահարվում է Արմանին: Հերոսուհիս նաեւ հանդիպում է մի մարդու, ով ներկայանում է որպես պրոդյուսեր` խոստանալով օգնել կարիերայի հարցում: Իրականում ամեն ինչ այլ կերպ է ընթանում. նա ստիպում է աղջկան երգել ակումբներում, սաունաներում»:
Քրիստինան հայտնել է, որ նկարահանումներին զուգահեռ ձայնագրությունների է մասնակցում, սերիալում հնչող 3 երգն էլ, որոնց հեղինակը Արման Անտոնյանն է, ինքն է կատարում.«Առաջին անգամն է, որ պիտի ներկայանամ որպես երգչուհի: Եթե արձագանքներից հասկանամ, որ հանդիսատեսը ուզում է՝ շարունակեմ երգել, ապա կերգեմ: ԻՆձ հոգեհարազատ են թե՛ դերասանական արվեստը, թե՛ երգարվեստը»:
Աղբյուրը՝ Bravo.am