Սերժ Սարգսյանի հրամանագրով երգչուհի Սիրուշոն այսօր արժանացել է ՀՀ Վաստակավոր արտիստի կոչման։ Երգչուհու ընտանիքում այս առիթով ուրախություն է, ինքը` Սիրուշոն, դեռ չգիտի կոչման մասին։ Tert.am Life–ի հետ զրույցում այս մասին հայտնեց նրա մայրը` երգչուհի Սյուզան Մարգարյանը:
Սիրուշոն որդու` Ռոբերտի հետ մեկնել է Եվրոպա։ «Այս մրցանակը մեր և Սիրուշոյի համար անսպասելի էր այնքանով, որ նա այսօր մեկնել է երկրից` առանց իմանալու, որ նման կոչման է արժանանալու։ Եթե իմանար, հնարավոր է, հետաձգեր մեկնումը։ Ես Tert.am Life–ի հրապարակումից եմ իմացել, որ Սիրուշոն Վաստակավոր արտիստի կոչում է ստացել։ Դրանից հետո սկսվեցին շնորհավորական զանգերը։ Փորձեցինք նամակագրական կապ հաստատել Սիրուշոյի հետ, սակայն էդպես էլ չհաջողվեց։ Այս պահին նրանց թռիչքն ընթացքի մեջ է։ Անհամբեր սպասում ենք իր հետ կապվելուն»,– պատմեց նա։
_1.jpg?1505997843218)
Սիրուշոյի ծնողները նույնպես ՀՀ Վաստակավոր արտիստներ են, սակայն իրենք այս կոչմանն արժանացել են ավելի մեծ տարիքում։ Սյուզան Մարգարյանն այս կոչմանն արժանացել է 2003 թվականին` 42 տարեկանում, ամուսինը` Հրաչյա Հարությունյանն այս կոչումը ստացել է 2006 թվականին` 45 տարեկանում։ Ծնողները հպարտանում են իրենց աղջկանով։
«Սիրուշոն արդեն 24 տարի է` բեմում է և նույնիսկ չեմ կարող թվարկել, թե որքան առիթներ ենք ունեցել հպարտանալու, երջանկանալու իր հաջողություններով։ Այսօր էլ հպարտ եմ, որ դուստրս երիտասարդ տարիքում հսկայական աշխատանք է արել և նման կոչման արժանացել»,– ասաց տկն Սյուզանը։
Աղբյուրը՝ tert.am