Կարմիր վարդի» բաղադրատոմսը. վիտամիններով հարուստ առողջարար աղցան՝ պահքի սեղանի համար

Ձեր ուշադրությանն ենք ներկայացնում  յուրահատուկ աղցանի բաղադրատոմս, որը հիանալի ուտեստ է պահքի շրջանում: «Կարմիր վարդ» կոչվող այս աղցանը ոչ ժամանակատար է, ոչ էլ ծախսատար, սակայն այն անչափ օգտակար է ու համեղ: Այս աղցանի բոլոր բաղադրիչները կարելի է գտնել յուրաքանչյուրի սառնարանում, սակայն այն պարունակում է շատ յուրահատուկ սոուս, որն էլ այն առանձնահատուկ է դարձնում:

Բաղադրությունը.

·         200 գրամ ճակնդեղ,

·         200 գրամ կարտոֆիլ,

·         200 գրամ մանր վարունգի թթու,

·         200 գրամ գազար,

·         1 միջին չափի սոխ,

·         70 մլ ձիթայուղ կամ խաղողի կորիզների յուղ,

·         20 մլ բալզամիկ քացախ,

·         1 թ.գ. քունջութ,

·         սև պղպեղ՝ ըստ ցանկության:

Պատրաստման եղանակը.

1.      Բանջարեղենը լավ լվանալ և առանց կեղևազրկելու խաշել: Հարկավոր է ուշադրություն դարձնել, որպեսզի դրանք չափազանց շատ չեփվեն, այլապես կկորցնեն իրենց համային ու որակական հատկությունները:

2.      Պատրաստի բանջարեղենը մաքրել և բարակ շերտերով կտրատել:

3.      Վարունգները կեղևազրկել և նույնպես բարակ շերտերով կտրատել: Ցանկության դեպքում վարունգը կարելի է չկեղևազրկել:

4.      Սոխը շատ մանր կտրատել և մարինացնել(բաժակի մեջ եռման ջուր լցնել, ավելացնել 1ճ.գ. շաքարավազ ու մի փոքր աղ, սոխը լցնել ստացված լուծույթի մեջ և դնել սառնարան մինչև սառի):

5.      Խառնել կտրատված բանջարեղենը:

6.      Ձիթայուղին խառնել քացախը, ավելացնել սև պղպեղը, լավ խառնել և ստացված համեղ սոուսն ավելացնել աղցանին:

7.      Աղցանը 20 րոպեով դնել սառնարան, որպեսզի այն սառի, այնուհետև մատուցել սեղանին:

8.      Ցանկության դեպքում աղցանին կարելի է ավելացնել նաև կանաչ ոլոռ: