Դիաբետն այն հիվանդություններից է, որոնք տարիներ շարունակ կարող են աննկատ մնալ: Այն զարգանում է արյան մեջ գլյուկոզայի քանակի բարձրացման հետևանքով: Steptohealth.ru-ի հաղորդմամբ՝ դիաբետի ախտանշաններն աստիճանաբար են ի հայտ գալիս: Դրանք բավական հեշտ է շփոթել այլ առողջական խնդիրների հետ, իսկ հիվանդությունը լուրջ բացասական ազդեցություն է ունենում այլ կարևոր օրգանների աշխատանքի վրա՝ երիկամներ, սիրտ, գլխուղեղ: Այդ պատճառով չափազանց կարևոր է ժամանակին ախտորոշել խնդիրն ու անհրաժեշտ բուժում ստանալ:
Թուլություն, հոգնածություն
Ինսուլինի անբավարար մակարդակը կամ ռեզիստենտությունը խանգարում են գլյուկոզայի յուրացումը: Դրա հետևանքով հյուսվածքները չեն կարողանում գյլուկոզան էներգիայի վերածել, ինչն անհրաժեշտ է էներգիայի ստացման համար: Արդյունքում՝ հիվանդը թուլություն է զգում, որպես կանոն՝ նույնիսկ լավ հանգիստը չի օգնում ազատվել այդ հոգնածությունից: Այս խնդիրը կարող է անհանգստացնել նաև ավելորդ քաշ ունեցող մարդկանց: Հոգնածության պատճառ կարող են դառնալ նաև ջրազրկումը, զարկերակային ճնշման անկումը:
Քնի հետ կապված խնդիրներ
Արյան մեջ գլյուկոզայի մակարդակի տատանումները հանգեցնում են քնի խանգարման, ինչն էլ քրոնիկ հոգնածության պատճառ է դառնում: Միևնույն ժամանակ անհրաժեշտ է նշել, որ դիաբետի զարգացման հավանականությունը մեծանում է անձանց շրջանում, ովքեր 6 ժամից քիչ են քնում:
Չորություն բերանում, ծարավի զգացում
Երբ գլյուկոզան ադեկվատ ձևով չի օգտագործվում, մարդուն կարող է անհանգստացնել ջրազրկումը, ինչը բացասաբար է անդրադառնում օրգանիզմի բոլոր հյուսվածքների կենսագործունեության վրա: Հիվանդի բերանում չորություն է առաջանում, ծարավի զգացում:
Միզարձակման հաճախակի ցանկություն
Արյան մեջ գլյուկոզայի ավելորդ քանակը երիկամներին ստիպում է լարված աշխատել՝ այդ նյութն օրգանիզմից դուրս բերելու համար: Արդյունքում՝ երիկամները գերծանրաբեռնվում են, հիվանդի մոտ հաճախ միզելու ցանկություն է առաջանում: Դիաբետով հիվանդների երիկամները չեն կարողանում օրգանիզմից նորմալ դուրս բերել տոքսինները:
Միզասեռական օրգանների վարակներ
Դիաբետի ամենատարածված նշաններից մեկը միզասեռական համակարգի քրոնիկ կամ շարունակական վարակներն են: Պատճառն այն է, որ շաքարի մակարդակի բարձրացումը թուլացնում է իմունային համակարգը: Արդյունքում՝ օրգանիզմը սկսում է ավելի քիչ հակամարմիններ արտադրել, նրա համար դժվարանում է վիրուսների, բակտերիաների, սնկերի դեմ պայքարը:
Վերքերը դանդաղ են ապաքինվում
Դիաբետի մասին կարող են վկայել վերքերի, վնասվածքների դանդաղ ապաքինումը: Եթե նույնիսկ փոքրիկ քերծվածքները երկար ժամանակ չեն ապաքինվում, դա վկայում է արյան մեջ գլյուկոզայի բարձր մակարդակի մասին: Այդ պատճառով էլ դիաբետով հիվանդների համար այդքան կարևոր է վնասվածքների ճիշտ խնամքը, որպեսզի չառաջանան բարդություններ, որոնք բժշկական միջամտություն են պահանջում:
Ոտքերի հետ կապված խնդիրներ
Զարգացող դիաբետը հանգեցնում է վերջույթներում նյարդերի վնասման, ինչի հետևանքով դրանք ավելի հաճախ են թմրում:
Տեսողության հետ կապված խնդիրներ
Արյան մեջ գլյուկոզայի բարձր մակարդակն առաջացնում է ջրազրկում, որը բացասաբար է ազդում տեսողության վրա: Դիաբետով հիվանդների մեծ մասին անհանգստացնում է ոչ հստակ տեսողությունը:
Ախորժակի մեծացում
Երբ գլյուկոզան նորմալ չի հասնում հյուսվածքներին, օրգանիզմը «վառելիքի» կարիք է ունենում, որն անհրաժեշտ է օրգանիզմի կենսագործունեության համար: Դա հանգեցնմում քաղցի հաճախակի զգացման:
Մաշկի չորություն
Մաշկի վիճակը շատ բան կարող է վկայել առողջության մասին: Դիաբետով տառապող մարդկանց մեծ մասը չոր մաշկ ունի: Այդ խնդիրը պայմանավորված է արյան շրջանառության խախտմամբ և ջրազրկմամբ: Իհարկե, մաշկի չորությունը կարող է ունենալ այլ պատճառներ ևս: